Monday, October 3, 2011

ഇവര്‍ ചില്ലറക്കാരല്ല

കുറെ കുട്ടികളും പിന്നെ ഒരു പട്ടിയും. അതാണ് ചില്ലര്‍ പാര്‍ട്ടി എന്ന ചിത്രത്തെക്കുറിച്ച് ഒറ്റവാക്കില്‍ പറയാനുള്ളത്. മസില്‍മാന്‍ സല്‍മാന്‍ ഖാനാണ് ചിത്രത്തിന്റെ പ്രൊഡ്യൂസര്‍. ചെറിയ വായയില്‍ വലിയ വര്‍ത്തമാനം പറയുന്ന കുട്ടികളല്ല ചിത്രത്തിലെ നായകന്‍മാര്‍. കുട്ടികളുടെ സൈക്കോളജി കൃത്യമായി അറിഞ്ഞെഴുതിയ തിരക്കഥ. ആരും അഭിനയിക്കുകയല്ല, ജീവിക്കുകയാണ് ഇവര്‍ ശരിക്കും. ജീവിതം ഇത്രയും സുന്ദരമാണല്ലോ എന്നും തോന്നിപോകും സിനിമ തീരുമ്പോള്‍.

ചന്ദന്‍ നഗര്‍ കോളനിയില്‍ കുഞ്ഞുങ്ങള്‍ എല്ലാവരും ഒന്നിനൊന്നു മെച്ചമാണ്. ഓരോര്‍ത്തര്‍ക്കും ഒരോ പ്രത്യേകതകളും ഇരട്ടപ്പേരുമുണ്ട്. എനിക്കാണെങ്കില്‍ എല്ലാവരെയും അങ്ങ് ഇഷ്ടമായി. ആരെയും ഇഷ്ടപ്പെടാതിരിക്കാനാവില്ല എന്നതാണ് സത്യം. അങ്ങിനെയിരിക്കുമ്പോള്‍ ഒരു ദിവസം അവിടെ ഒരാനാഥ ബാലന്‍ അവിടെ തന്റെ പട്ടിയുമായി വരുന്നത്. കോളനിയിലെ കാറുകള്‍ കഴുകുകയാണ് അവന്റെ പണി. കോളനിയിലെ പഴകിയ ഒരു നീലക്കാറിലാണ് അവന്‍ പിന്നീട് താമസിക്കുന്നത്. പട്ടിയെ കോളനിയിലെ കുട്ടികള്‍ക്ക് ഇഷ്ടമല്ല. കുട്ടിയെയും പട്ടിയെയും അകറ്റാന്‍ അവര്‍ പടിച്ച പണി എല്ലാം നോക്കിയിട്ടും അവര്‍ക്ക് സാധിക്കുന്നില്ല. മാത്രമല്ല ഇരുവര്‍ക്കും പരസ്പരമുള്ള സ്‌നേഹം അവര്‍ക്കു മനസിലാകുന്നു. അടുത്ത് കോളനിയിലെ മുതിര്‍ന്ന പയ്യന്‍മാരെ ക്രിക്കറ്റില്‍ തറപ്പറ്റിക്കുന്നതോടെ പിന്നെ ഫട്ക്കയെന്ന കുട്ടിയും ബിദ്ദു എന്ന നായയും കോളനിയിലെ കുട്ടികളുടെ കണ്ണിലുണിയാവുന്നു.


അങ്ങിനെയിരിക്കുമ്പോഴാണ് ബിദ്ദു ഒരു പ്രശ്‌നത്തില്‍പ്പെടുന്നത്. കോളനിയില്‍ ഒരു പ്രോഗ്രാമിന് വരുന്ന മന്ത്രിയുടെ പി എസിനു നേരെ ബിദ്ദു കുരച്ചുചാടുന്നതോടെ ബിദ്ദുവിന്റെ ദിവസങ്ങള്‍ എണ്ണപ്പെടുകയും ചിത്രത്തിന്റെ ഗതി മാറുകയും ചെയ്യുന്നു.കോളനിയിലെ എല്ലാവരും ബിദ്ദുവിനെ കോര്‍പ്പറേഷന് വിട്ടുകൊടുക്കാന്‍ സമ്മതമാണെന്നു പറയുമ്പോഴും കുട്ടികള്‍ അതിനെ മറികടക്കാന്‍ ശ്രമിക്കുകയാണ്. അതിനായി അവര്‍ പത്രത്തില്‍ വാര്‍ത്തകള്‍ കൊടുക്കുന്നു, ചഢി മാര്‍ച്ച് നടത്തുന്നു...അവസാനം വാര്‍ത്താ ചാനലില്‍ നടന്ന ഡിബേറ്റില്‍ കുട്ടികള്‍ മന്ത്രിയെ തറപ്പറ്റിക്കുന്നു. ബിദ്ദുവിനെ കോര്‍പ്പറേഷന് വിട്ടുകൊടുക്കേണ്ടന്ന് കോളനിയിലെ 31 അംഗങ്ങള്‍ സമ്മതപത്രത്തില്‍ ഒപ്പിട്ടുകൊടുക്കുന്നു. മനോഹരമാണ് ഇതിലെ ഓരേ സീനും, ഓരോ കുട്ടികളുടെ അഭിനയവും.

സുഹൃത്തിനോടുള്ള സ്‌നേഹം, സഹജീവികളോടുള്ള സഹാനുഭൂതി, മറ്റുള്ളവരുടെ ആവശ്യങ്ങളില്‍ പങ്കാളിയാവാനുള്ള മനസ്സ്, സത്യത്തോട് ചേര്‍ന്നുനില്‍ക്കല്‍, പരിശ്രമം എന്നിവയാണ് ചില്ലര്‍ പാര്‍ട്ടി നമുക്ക് തരുന്ന സന്ദേശം. തീര്‍ച്ചയായും ഈ സിനിമ എല്ലാവരും കാണേണ്ടതാണ്. ഈ കുഞ്ഞുങ്ങള്‍ നിങ്ങളുടെ മനസ്സില്‍ നിന്നും ഒഴിഞ്ഞു പോകില്ല, തീര്‍ച്ച!

3 comments:

saritha said...

I Just loved it, hope you too would like it

Typed with the Middle Finger said...

:) cool-let me check if there is a show. thanks for the review

Abubakar e.a said...

ഈ സന്ദേശങ്ങള്‍ എല്ലാം ഉള്ള ഒരാളായ ഞാന്‍ ഇനി ആ സിനിമ കാണണോ ?